Қазақстанның бірнеше өңірінде наурыз айынан бастап ауыр жүк көліктерінің жүруіне тыйым салынады

Қазақстанда 2025 жылғы 1 наурыздан бастап ауыр жүк көліктеріне уақытша шектеу қойылады, деп хабарлайды Azattyq Rýhy.

«ҚазАвтоЖол» мәліметінше, 2025 жылғы көктемгі кезеңде уақытша жүрісті шектеудің жыл сайынғы қолданылу мерзімдеріне сәйкес жеке білікке түсетін жүктемесі 8 тоннадан артық автокөлік құралдарының жүрісіне шектеу енгізілетінін хабарлайды.

Индустрия және инфрақұрылымдық даму министрінің 2023 жылғы 5 шілдедегі №492 бұйрығының 19 тармағына сәйкес, республикалық автожолдарды қысқы мезгілден кейін сақтау мақсатында 2025 жылғы 1 наурыздан бастап 1 сәуірге дейін «бесінші жол климаттық аймаққа» жататын келесі сегіз облыста шектеу енгізіледі:

• Алматы облысы;
• Атырау облысы;
• Жамбыл облысы;
• Ұлытау облысы;
• Қызылорда облысы;
• Маңғыстау облысы;
• Жетісу облысы;
• Түркістан облысы.

Алайда мына автокөліктердің түрлеріне бұл шектеулер қолданылмайды:

• халықаралық жүк және жолаушылар тасымалына;
• төтенше жағдайлар мен олардың салдарын алдын алу және оларды жою жөніндегі іс-шараларды жүзеге асыратын көліктерге;
• гуманитарлық көмек көрсететін, азық-түліктерді, дәрі-дәрмектерді, жолаушылар мен багаж тасымалын жүзеге асыратын көліктерге;
• жол-құрылыс жұмыстарына пайдаланылатын көліктерге.

«Жүргізушілер мен көлік иелеріне осы ақпаратты маршруттарыңызды жоспарлағанда ескерулеріңізді сұраймыз», - делінген «ҚазАвтоЖол» хабарламасында.