Қостанайда 85 млн теңгенің вейпі тәркіленді

Қостанайда 8,5 мың дана вейп тәркіленді. Оның жалпы құны 85 млн теңгеге бағаланып отыр, деп хабарлайды Azattyq Rýhy ақпарат агенттігі Polisia.kz-ке сілтеме жасап.

Қостанай облысы полиция департаментінің есірткі қылмысына қарсы іс-қимыл басқармасының қызметкерлері электронды темекі өнімдерін –  вейптерді заңсыз сатумен айналысқан интернет дүкеннің жұмысын тоқтатты. Тексеру барысында анықталғандай, екі жергілікті тұрғын Telegram мессенджері арқылы вейптерді тарату арнасын ұйымдастырған. Заңсыз сауда нүктесі қаладағы үйлердің бірінің  жертөлесінде жұмыс істегені анықталды. Онда вейптер сатылып, Telegram арқылы тапсырыстар қабылдау үшін байланыс орталығы қызмет еткен.

«Тінту іс-шараларының нәтижесінде сауда нүктесінен 8,5 мың электронды темекі бұйымдары салынған 73 картон қорап тәркіленді. Сонымен қатар жертөледе орналасқан дүкеннен 6 темекі шегетін құрылғы, 4 ноутбук, 10 вейп аккумуляторы, 7 ұялы телефон және 2 жүйелік блок тәркіленді. Ұсталғандардың бірі тауардың Алматы қаласындағы жеткізушілерден алынғанын және бір вейптің құны шамамен 10 мың теңге екенін айтты  Қазіргі уақытта полиция қызметкерлері темекі шекпейтін бұйымдардың, вейптердің, хош иістендіргіштер мен оларға арналған сұйықтықтардың заңсыз айналымына қатысты сотқа дейінгі тергеу жұмыстарын бастады», - делінген Полиция таратқан хабарламада.

Сонымен қатар вейптерді жеткізудің заңсыз арнасын анықтауға бағытталған шаралар жүргізілуде. Полиция департаменті мұндай бұйымдарды заңсыз сату және тарату Қазақстан Республикасы заңнамасына сәйкес, 200 АЕК мөлшерінде айыппұл салуға немесе 50 тәулікке дейін қамауға алуға әкелетінін ескертеді.

Ақпарат көзі Polisia.kz сайтында: https://polisia.kz/qostanajda-85-mln-tenggening-vejpi-tarkilendi/