Облыста қар көшкіні қаупі жарияланды
Шығыс Қазақстан облысында қар көшкіні түсіп, жолды жауып тастады. Сонымен қатар 17-20 қаңтар аралығында облыстың таулы аймақтарында қар көшкіні қаупі жарияланды, деп хабарлайды Azattyq Rýhy ҚР Төтенше жағдайлар министрлігінің баспасөз қызметіне сілтеме жасап.
«Қазселқорғау» мекемесінің мәліметінше, Ұлан ауданындағы Өскемен – Самарское автожолының 101-шақырымында қатты жауын-шашын мен желдің күшеюі салдарынан көлемі 370 текше метрді құрайтын қар көшкіні өздігінен түскен», — делінген хабарламада.
Құтқару қызметінің мәліметі бойынша, қаза тапқандар мен зардап шеккендер жоқ. Қар көшкіні жолды жауып тастаған. Жолды «Облшығысжол» ЖШС күштері тазартқан.
Облыстың таулы аймақтарында 17-20 қаңтар аралығында қар көшпіні қаупі сақталады. Төтенше жағдайлар министрлігі тұрғындарға тауға сапарлардан бас тартуды ұсынады.