Еліміздің алғашқы бас мүфтиіне автокөлік мінгізді
Темір тұлпарды ҚМДБ төрағасы тарту етті
ҚМДБ төрағасы Наурызбай Тағанұлы еліміздің бас діни басқармасын басқарған Рәтбек қажы Нысанбайұлына көлік сыйлады, деп хабарлайды Azattyq Rýhy.
«Өздеріңіз жақсы білесіздер, 1990 жылдың 12 қаңтарында, қасиетті жұма күні қазақ елінің рухани өмірінде үлкен тарихи оқиға орын алды. Дәл осы жерде, яғни Алматы қаласындағы Орталық мешітте біздің мүфтиятымыз Орталық Азия мұсылмандарының діни басқармасынан бөлініп шығып, Қазақстан мұсылмандары діни басқармасы болып қайта құрылғаны туралы қуанышты хабар жарияланды. Бұл қуанышты хабарды Қазақстан мұсылмандарының бірінші құрылтайында бас мүфти болып сайланған Рәтбек қажы Нысанбайұлы жариялаған болатын», – деді Наурызбай Тағанұлы.
Рәтбек қажы Нысанбайұлы еліміздің бас мүфтиі қызметін 1990-2000 жылдары атқарды. Кейін бұл міндет 2013 жылға дейін Әбсаттар Қажы Дербісалыұлына жүктелді. 2013-2017 жылдары бас мүфти лауазымын Ержан қажы Малғажыұлы, 2017-2020 жылдары Серікбай қажы Ораз атқарды. Ал 2020 жылдан бері Наурызбай қажы Тағанұлы бас мүфти лауазымында.
