Қазіргі уақытта 130 адам жарақат алған
Тибет автономиялық аймағында болған жер сілкінісінен қаза тапқандар саны 95 адамға жетті. Бұл туралы Қытайдың «Синьхуа» агенттігі жазды, деп хабарлайды Azattyq Rýhy.
«Жер сілкінісі бүгін таңғы 9:05-те (пекин уақыты) Сигадзэ қаласының Тингри уезіндегі Цого ауылында тіркелген. Зілзала магнитудасы 6,8 баллды құраған. Эпицентрден 20 шақырым радиуста 6 900 адам тұратын 27 ауыл орналасқан. Ресми деректер бойынша, қазіргі уақытта 130 адам жарақат алған. Құтқару жұмыстарын жүргізу үшін апат аймағына 3 400-ден астам құтқарушы мен 340 медициналық қызметкер жіберілген», — деп жазылған материалда.
Қазақстан Президенті Қасым-Жомарт Тоқаев Қытай Халық Республикасының төрағасы Си Цзиньпинге көңіл айту жеделхатын жолдады. Президент өзінің және Қазақстан халқының атынан қаза болғандардың отбасыларына және Қытай халқына көңіл айтып, зардап шеккендерге тез сауығып кетуін тіледі.