Астанада алғаш рет егіз балаға жүкті әйелге жатырішілік операция жасалды
Операция шетелдік мамандардың қатысуынсыз өтті
Астанада алғаш рет егіз балаға жүкті әйелге фето-фетальды трансфузия синдромын түзету бойынша жатырішілік хирургиялық операция сәтті жасалды. Бұл фетальды хирургия саласында жоғары мамандандырылған медициналық көмектің жаңа түрі саналады. Бұл туралы ақпарат елорда әкімдігінің ресми сайтында жарияланды, деп хабарлайды Azattyq Rýhy.
Операция елордадағы №2 көпбейінді қалалық аурухана базасында шетелдік мамандардың қатысуынсыз өтті.
«Фетальды хирургияны енгізу акушерлік және перинаталдық медицина саласында жаңа мүмкіндіктерге жол ашады. Бұрын мұндай көмекті қажет ететін жүкті әйелдер шетелдегі арнайы орталықтарға жүгінуге мәжбүр болатын. Бұл үлкен шығындарға, логистикалық қиындықтарға және қосымша қауіптерге алып келетін. Енді бұл қызмет Астанада қолжетімді және жоғары кәсіби деңгейде ұсынылады«, – деді елорда денсаулық сақтау басқармасының басшысы Әлия Рүстемова.
41 жастағы жүкті әйел көпұрықты жүктілікке байланысты асқынулармен және ұрықтардың жатырішілік өлімі қаупімен ауруханаға жатқызылды. Операцияға дайындық кезінде дәрігерлер диагностика алгоритмдерін жасап, көрсеткіштерді дәл бағалауға жағдай жасады. Бұл операция кезінде ана мен балалардың денсаулығына қауіпті минимизациялауға мүмкіндік берді.
«Медицина қызметкерлеріне, дәрігерлерге үлкен алғысымды білдіремін. Барлығы ойдағыдай өтті, мамандар өте мұқият болды», – деді жүкті әйел Айгүл Кенжеева.
Операция аурухананың медициналық ұжымы мен профессорлар құрамының қатысуымен сәтті аяқталды.
«Біздің клиникада жоғары мамандандырылған жаңа медициналық қызмет – фетальды хирургия енгізілді. Елорда әкімдігінің белсенді қолдауымен бұл операцияны өз күшімізбен сәтті жүзеге асырдық. Бұл оқиға медицинаның ең күрделі шақыруларын бірге еңсеруге қабілетті екенімізді көрсетеді», – деді аурухана директоры Нұрбол Тұрсынбаев.
Фетальды хирургия – жатыр ішінде ұрықтың ауыр патологияларын диагностикалау және емдеуге бағытталған медицина саласы. Мұндай операциялар арқылы ұрықтың денсаулығы мен өмірін сақтау, босану кезіндегі асқыну қаупін азайту және баланың ұзақ мерзімді болжамдарын айтарлықтай жақсартуға болады.
