Олар 2011, 2015, 2021 және 2022 жылы туған
Астанада екі қабатты жеке тұрғын үйде болған өрт салдарынан төрт бала қаза тапты, деп хабарлайды Azattyq Rýhy қалалық Төтенше жағдайлар департаментінің баспасөз қызметіне сілтеме жасап.
Өрт жеке тұрғын үйде болған. Төтенше жағдайлар қызметіне хабар түскеннен кейін құтқарушылар оқиға орнына 6 минут ішінде жеткен. Оқиға орнына келгенде үйден ашық жалын шыққаны анықталды.
«Өрт сөндіру және оқшаулау жұмыстары жүргізіліп, толықтай тоқтатылды. Өкінішке қарай, өрт салдарынан 2011, 2015, 2021 және 2022 жылы туған төрт бала қаза тапты», — деп хабарлады департамент өкілдері.
Оқиғаның себептері анықталып жатыр. Құқық қорғау органдары мен зерттеу өрт лабораториясы тергеу жұмыстарын бастады. Сонымен қатар қайтыс болған балалардың жақындарына психолог мамандар психологиялық көмек көрсетіп жатыр.
Төтенше жағдайлар департаменті тұрғындарға өрт қауіпсіздігін сақтау бойынша қатаң ескерту жасады. Әсіресе, жылыту маусымында электр құрылғыларын дұрыс қолдану және өрт қауіпсіздігі ережелерін қадағалау қажеттігі айтылды.