Оған 5 жыл мерзімге бас бостандығынан айыру жазасы тағайындалған
Қызылордада қаржылық пирамида құрған азаматшаға қатысты сот үкімі шықты. Бұл туралы облыстық прокуратураның баспасөз қызметінен мәлім етті, деп хабарлайды Azattyq Rýhy.
Прокуратураның мәліметінше, азаматша Шагирова кооперативтік филиал ашу арқылы интернет желісінде ешқандай пайызсыз үй және автокөлік алуды жарнамалап, үгіт-насихат жұмыстарын жүргізіп, салымшыларды өзіне ақшалай салым жасауға шақырған.
«Оның қылмыстық әрекетінің салдарынан Қызылорда қаласының 11 тұрғынына 15 млн теңге көлемінде мүліктік зиян келсе, 3 жәбірленуші 2 автокөлігінен және 1 азамат жер телімінен айырылған», - делінген хабарламада.
Қызылорда қаласының №2 сотының үкімімен азаматша Шагирова Қазақстан Республикасы ҚК-нің 217-бабы 3-бөлігінің 2-тармағымен кінәлі деп танылып, мүлкі тәркіленіп, 5 жыл мерзімге бас бостандығынан айыру жазасы тағайындалған.
«Өз кезегінде, қастандық ойлаушылардың тұзағына түсіп қалмау үшін қаржылық пирамиданың басты белгілерін білген дұрыс. Аса жоғары пайыз, күн сайынғы кіріс және әр ертіп келген адам үшін бонус ұсынса, сеніп қалмаңыз, бұл нағыз қаржылық пирамиданың белгісі. Бүгінгі таңда қаржылық пирамида құрушылар танымал блогерлер мен жұлдыздарға жарнама жасатып, өз қылмыстық әрекеттерін тоқтатпай отыр», - деп ескертеді прокуратурадан.