Оқиға биыл 11 тамыз күні кешкі уақытта болған
Сәтбаев қаласында жанжал үстінде ағасының кеудесін пышақ тыққан ер адамға қатысты сот үкімі жарияланды, деп хабарлайды Azattyq Rýhy.
Қалалық соттың мәліметінше, оқиға биыл 11 тамыз күні шамамен сағат 21:00-де болған. Айыпталушы азаматтық әйелі «Ц»-мен бірге үйіне мас күйінде келген. Ал үйінде оның ағасы «Т» мен қарындасы «Т» болған. Шамалы уақыттан кейін қонақ бөлмеге кіргенде, ағасы мен қарындасының бір-бірімен ұрысып жатқандығы туралы көрініске куә болған ол ағасын сабырға шақырған. Алайда, ағасы одан әрі агрессия таныту салдарынан жанжал шыққан.
Шамамен 22:00-де сотталушының ағасына ауыр дене жарақатын келтіру туралы ой-ниетін жүзеге асыру үшін ас бөлмеге барып, үстелден ас үй пышағын алып, диванда жатқан ағасының кеудесінің оң жақ тұсына бір рет тығып алған. Салдарынан зардап шегуші «Т» Сәтбаев қаласының №1 орталық ауруханасына «Оң жақ кеуде аймағының тесілген пышақ жарақаты, пневмоторакс» деген диагнозбен жеткізілген.
«Сот отырысында сотталушы кінәсін толық мойындап, жасаған ісіне өкінетінін айтты. Сондай-ақ оның кінәсі сотқа ұсынылған және сотта зерттелген дәлелдермен расталды.
Жаза тағайындау кезінде сот кінәні толық мойындау және ауырлататын себептердің болмауы сияқты жеңілдететін мән-жайларды ескерді.
Сот үкімімен «Т» ҚР ҚК 106-бабының 1-бөлігі бойынша кінәлі деп танылып, 4 (төрт) жыл мерзімге бас бостандығынан айыру жазасы тағайындалып, жазасын қылмыстық-атқару жүйесінің орташа қауіпсіздік мекемесінде өтеу белгіленді.
Үкім заңды күшіне енген жоқ», - делінген хабарламада.