Күдікті көлікті көрші аулада қалдырып, екінші көлікті ұрламақ болған
Көкшетауда Ұлттық гвардияның әскери қызметкері батылдық танытып, көлік ұрлаушыны қолға түсірді, деп хабарлайды Azattyq Rýhy.
Мәліметтерге сәйкес, оқиға 1 қараша күні таңғы уақытта қаладағы үйлердің бірінің ауласында болған. Ұлттық ұланның баспасөз қызметі мәлімдегендей, кіші сержант Жеңіс Ахметов кезекшіліктен үйіне оралғаннан кейін, таңғы сағат 5 шамасында әйелінің «Көлігімізді біреу айдап кетті» деген сөздерінен оянған. Сержант дереу сыртқа шығып, көлігінің белгісіз біреудің қолында екенін байқап, оның артынан жүгірген.
Күдікті көлікті көрші аулаға бұрып, сол жерде қалдырып, екінші көлікті ұрламақ болған. Алайда Ұлттық ұлан сарбазы оны қуып жетіп, ұстап үлгерген.
«Күдікті менің көлігімді айдап кетіп бара жатқанын көрдім. Оны қуған кезде көлік шұңқырға түсіп, тоқтап қалды. Бірақ ұрлықшы тоқтамай, басқа көлікті айдап кетпек болды. Сол сәтте оны қуып жетіп, ұстап алдым. Бұл ерлік емес, бұл біздің күнделікті жұмысымыз», – деп бөлісті Жеңіс Ахметов.
Күдіктіні ұстағаннан кейін, кіші сержант оны полиция қызметкерлеріне тапсырды. Қазіргі уақытта оқиғаның барлық мән-жайы анықталып жатыр.