Өңірде жыл басынан бері қос азаматтығы бар 17 адам анықталған
Атырауда 1 жылдан бері қос азаматтығын жасырып келген ер адам 516 мың теңге айыппұл арқалады. Бұл туралы Атырау облыстық ПД баспасөз қызметінен мәлім етті, деп хабарлайды Azattyq Rýhy.
ПД мәліметінше, өңірде жыл басынан бері қос азаматтығы бар 17 адам анықталған.
«Сот шешімімен 15 адамға айыппұл салынды. Ал, 2 адам Қазақстан Республикасының аумағынан әкімшілік жолмен шығарылды. Мәселен, Құрманғазы ауданының 47 жастағы тұрғыны 2002 жылы алғаш рет Қазақстан азаматының жеке басын куәландыратын құжаттарын рәсімдеген. Алайда, 2023 жылы Ресей Федерациясының азаматтығын қабылдап, сол жылы шілде айында сол елдің азаматтығын куәландыратын құжаттарын алған. Ер адамға қатысты ҚР азаматтық туралы заңнамасын бұзу, яғни ел заңнамасында белгіленген мерзімдерде шетел азаматтығын алу фактісін хабарламау бойынша әкімшілік хаттама толтырылды. Іс құжаттары процессуалдық шешім қабылдау үшін Құрманғазы аудандық сотына жолданды. Сот шешімімен қос азаматтағы бар ер адам кінәлі деп танылды. Оған 140 айлық есептік көрсеткіш – 516 мың 880 теңге көлемінде айыппұл салынды. Айыппұл мемлекет пайдасына өндірілді», - делінген хабарламада.
Аталған дерек негізінде 47 жастағы ер адам Қазақстан азаматтығынан айырылғаны тіркелді. Соған байланысты мәліметтер тиісті ақпараттық жүйелерге енгізілді.