«Жүкті әйелді өлтіруге оқталған»: Павлодар облысында жасөспірім тоғыз жылға сотталды

Павлодар облысында жүкті әйелді өлтіруге оқталғаны және психотропты затты сақтағаны үшін жасөспірім тоғыз жылға сотталды, деп хабарлайды Azattyq Rýhy.

Павлодар облысы қылмыстық істер жөніндегі мамандандырылған ауданаралық сотында психотроптық заттың аналогын сақтау және  жүктi әйелдi өлтіруге оқталу фактісі бойынша кәмілетке толмаған жасқа қатысты қылмыстық іс қаралды. Істің мән-жайы жария етуге жатпайтын болғандықтан, іс жабық сот отырысында қаралды.

«Сотта прокурор Д-ны кінәлі деп танып, қылмыстық құқық бұзушылықтар жиынтығы бойынша 9 жыл 5 күнге бас бостандығынан айыру түріндегі жаза тағайындауды сұрады. Жәбірленуші өкілдері мемлекеттік айыптаушыны толық қолдап, осы баптар бойынша ең жоғары жаза тағайындауды, 15 миллион теңге көлемінде моральдық шығынды өтеу туралы талапты толық қанағаттандыруды сұрады», - делінген сот хабарламасында.

Сотталушы психотроптық зат сақтағанын толық мойындады. Алайда ол жүкті әйелді өлтіруге оқталғанын мойындамады, соттан өзін ақтауды сұрады.