Ол іс бойынша куәгер ретінде шақырылған
Блогер Әлихан Байзақовтың ұсталуы туралы Алматы полиция департаментінде түсініктеме берілді, деп хабарлайды Azattyq Rýhy.
Құқық қорғау органдарының қызметкерлері блогерді тұтқындады деген ақпарат бүгін түстен кейін әлеуметтік желілерде пайда болды. Сонымен қатар, Әлихан Байзақовты қомақты ақша бопсалады деген күдікпен ұстады және тінту кезінде одан қару тәркіленді деген болжам айтылды.
Оқиға туралы Алматы полиция департаментінің баспасөз қызметі хабарлады. Блогердің полицияға жеткізілгені анықталды, бірақ ол іс бойынша куәгер ретінде шақырылған.
«Алматы қаласының полиция департаменті аталған азаматтың полицияға куә ретінде жеткізілгенін хабарлайды. Тергеу амалдары жүргізілгеннен кейін ол босатылды»,- делінген хабарламада.