Абай облысында табиғи өрт трагедиясын енді болдырмау үшін не істеліп жатыр

«Семей орманы» резерватында материалды-техникалық базаны жаңарту, орман шаруашылығы қызметкерлерін қолдау мәселелері тақыланды, деп хабарлайды Azattyq Rýhy.

Өңірге премьер-министр Олжас Бектенов барды.

• 2023-2027 жылдарға арналған «Семей орманы» резерваты үшін материалдық техникалық жарақтандыруды кезең-кезеңімен нығайту жөніндегі кешенді жоспар шеңберінде былтыр жалпы сомасы 1,4 млрд теңге бөлінді. Оған 37 бірлік арнайы техника сатып алынды.
• Президенттің тапсырмасы бойынша өткен жылы мемлекеттік орман күзетінің 12 876 қызметкерінің жалақысы 100%-ға көтерілді.
• Биыл Үкімет қаулысымен 1 шілдеден бастап еліміздегі орман және табиғатты қорғау мекемелерінің қызметкерлері лауазымдық жалақыларына үстемеақы ала бастады. Барлығы 3,3 мыңға жуық қызметкер қосымша ақымен қамтылды. Бұл мақсатта 2024-2027 жылдарға республикалық бюджеттен 8,4 млрд теңге қарастырылған.

Үкімет басшысы өрт қауіпсіздігінің маңыздылығына тоқталды.

«Орман алқаптарын сақтау мәселесі және өртке қарсы шараларды қабылдау біздің ерекше назарымызда болады. Мұндай апаттардың қайталануына жол беруге болмайды. Апаттың алдын алу шараларын қағаз жүзінде емес, нақты іс жүзінде толықтай жүзеге асыру маңызды. Ол үшін біз резерватты жарақтандыруды жалғастырамыз, оның ішінде орман өрттерін ерте анықтау жүйесін орнатамыз», - деп атап өтті Олжас Бектенов.

Экология және табиғи ресурстар министрлігіне Абай облысының әкімдігімен және мүдделі мемлекеттік органдармен бірлесіп, «Семей орманын» материалдық-техникалық жарақтандыру және орман алқабын молайту жөніндегі жұмыстарды жалғастыру, сондай-ақ күйген ағаштарды кәдеге асыру жөніндегі жобаны іске асыруға қолдау көрсету тапсырылды.

Бүгінгі таңда Абай облысында табиғи өрттердің алдын алу және дер кезінде әрекет ету мақсатында 132 адамнан тұратын 32 мобилді топ құрылды. «Қазавиақұтқару» тікұшағы кезекшілікте және аумақты патрульдеу жүргізіледі. 404 рейдтік іс-шара өткізілді, 109 тәртіп бұзушы әкімшілік жауапкершілікке тартылды.