Алматы прокуроры орынбасарының ұсталғаны туралы ақпарат шындыққа жанаспайды
Бүгінгі күні ол кезекті еңбек демалысында
Алматы қаласы прокурорының орынбасары Ауғанбаевтың ұсталғаны туралы ақпарат шындыққа жанаспайды. Бұл туралы Алматы қалалық прокуратурасы ресми түрде мәлім етті, деп хабарлайды Azattyq Rýhy.
«Алматы қаласы прокурорының орынбасары Н.Ж. Ауғанбаевтың ұсталғаны туралы ақпарат шындыққа жанаспайды. Бүгінгі күні ол кезекті еңбек демалысында», - деп хабарлады прокуратурадан.
Ведомство Қазақстан Республикасы Қылмыстық кодексінің 274-бабына сәйкес көрінеу жалған ақпарат таратқаны үшін сондай-ақ «Бұқаралық ақпарат құралдары туралы» Қазақстан Республикасы заңының 25-бабына сәйкес шындыққа сәйкес келмейтін мәліметтерді тарату, Қазақстан Республикасының заңнамалық актілерінде көзделген жауаптылыққа әкеп соғатынын еске салды.
Алматы қаласының прокуратурасы азаматтарды, БАҚ өкілдерін, әлеуметтік желілерді пайдаланушыларды, Қазақстан Республикасының заңнамасын мүлтіксіз сақтауға және тек шынайы ақпарат көздеріне ғана сенуге шақырады.
Айта кетейік, бұған дейін бұқаралық ақпарат құралдарының бірінде Алматы қаласы прокурорының орынбасары Нұрлан Ауғанбаевтың қамауға алынғаны туралы ақпарат тараған болатын.
