Елена Рыбакина Мадридтегі турнирдің үшінші кезеңіне шықты

Azattyq Rýhy

Рыбакина өткен аптада Штутгарт WTA 500 турнирінде чемпион атанған болатын

Елена Рыбакина Мадридтегі турнирдің үшінші кезеңіне шықты
Фото: ktf.kz

Елена Рыбакина Мадрид (Испания) WTA 1000 турнирінің үшінші айналымына шықты. Бұл туралы федерацияның ресми сайты мәлімдеді, деп хабарлайды Azattyq Ruhy Olimpyc.kz-ке сілтеме жасап.

Жарысты екінші айналымнан бастаған қазақстандық теннисші алғашқы матчын дүниежүзілік рейтингіде 46-орында тұрған италиялық Лючия Бронцеттимен өткізді.

Бұл қос теннисшінің өзара бірінші кездесуі еді.

Бастапқы партияда Елена 2:0 есебімен алға шыққанымен, Лючия таразы басын теңестірді. Дегенмен Рыбакина брейкпен тәмамдады – 6:4.

Екінші сетті Бронцетти брейкпен бастағанымен, Рыбакина ойын тізгінін қайта қолға алды – 4:1. Содан кейін қатарынан үш эйс жасап, бірінші матчболын сәтті пайдаланды – 6:3.

Елена Рыбакина төртінші айналымға шығу үшін әлемнің 21-ракеткасы, украиналық Марта Костюк немесе рейтингіде 72-сатыдағы мысырлық Майар Шерифтің қай жеңгенімен шеберлік таластырады.

Рыбакина өткен аптада Штутгарт WTA 500 турнирінде чемпион атанған болатын.

×
Бұл желілік ресурстың ақпараттық өнімдері 18 жастан асқан адамдарға арналған.