Елордада көшелерді балшықпен былғағаны үшін 18 құрылыс нысаны жазаланды
Қалада тексеріс жүргізілді
Қалалық қоршаған ортаны бақылау және сапа басқармасы аудан әкімдіктерінің мамандарымен бірлесіп, құрылыс нысандарының арасында бірқатар бұзушылықтарды анықтады, деп хабарлайды Azattyq Ruhy қала әкімдігіне сілтеме жасап.
«Құрылыс нысандарындағы дөңгелектерді жуу пунктінің, негізгі жол төсеміне қатты жанасуының, құрылыс қоршауларының тиісті жай-күйінің бар-жоғы тексерілді. Нәтижесінде 88 нысанда ескертулер анықталды. Бұзушылықтар жойылмаған жағдайда полиция департаменті ҚР ӘҚБтК 505 және 630-баптары бойынша қоршаулар мен дөңгелектерді жуу пункттері нормаларының талаптарына сәйкес келмегені үшін әкімшілік хаттамалар жасайтынын атап өткен жөн», - делінген хабарламада.
Осылайша, елорданың табиғатты қорғау полициясы абаттандыру ережелерін бұзғаны үшін, оның ішінде қоршаулардың дұрыс емес жағдайы үшін 18 құрылыс нысаны әкімшілік жауапкершілікке тартылды.
