Қостанай облысындағы жағдай: 243 үй су астында қалып, 7 мыңнан астам адам құтқарылды

Қостанай облысында тілсіз жаумен күрес жалғасуда. 25 наурыздан бастап құтқарушылар өңірдің оңтүстігіндегі Арқалық, Жангелді, Торғай аудандарында қызмет көрсетті. Бүгінде Қостанай облысының орталық аймақтарында Қарабалық, Федоровка, Әулиекөл, Қостанай ауданында жұмыс істеп жатыр. Бұл туралы Қостанай облысы ТЖД бастығының орынбасары Асылбек Садуов ОКҚ брифингінде мәлім етті, деп хабарлайды Azattyq Ruhy.

Жақын арада Қостанай қаласы бойынша төтенше жағдай жарияланды. Себебі, Тобыл өзені мен оның маңайындағы су деңгейі көтерілді. Маңайындағы саяжай қоғамдарын су басады деген ақпарат болғаннан кейін, кешеден бері сол маңайда тұратын адамдарды құтқару жұмыстары басталды.

«Су басқан үйлердің саны – 243, аула аймақтары – 406.  Тәрбие нысаны - 3, кәсіпкерлік орындар -19. Бірінші күннен бастап, құтқару жұмыстарының басынан бастап 7 мыңнан астам адам құтқарылды. Кешегі бір тәулік ішінде 172 адам, соның ішінде 44 бала құтқарылды. Қостанай ауданы және Рудный қаласын бақылауға алып отырмыз. Себебі, Тобыл өзені көтерілді. 700-ден астам уақытша орналастыру орындары  бар. 274 бала бар. Жеке құрам бойынша 2500 адам құтқару жұмыстарына атсалысуда. 393 техника, 142 мотопомпа бар», - деді Асылбек Садуов.