Оқиға «Шандықсор» жасанды су айдынында болған
Екібастұзда балық аулауға шыққан екі адам көлігімен бірге мұз астына түсіп кетті. Қайғылы оқиға кеше кешке болды. Көлік жағадан шамамен 700-800 метр жердегі мұз ойығына құлап кеткен. Бұл туралы Azattyq Ruhy ҚР ТЖМ баспасөз қызметіне сілтеме жасап хабарлайды.
Ведомство мәліметінше, оқиға Екібастұздың ГРЭС-2 стансасы аумағында, «Шандықсор» жасанды су қоймасында болған. 1978 және 1976 жылғы екі ер адам балық аулауға шығып, жеке көлікпен мұз астына түсіп кеткен.
«22 наурызда сағат 20:33 Екібастұз қаласында, ГРЭС-2 ауданында, «Шандықсор» жасанды су айдынында 1978 және 1976 жылы туған ер адамдар жеке көліктерімен мұз астына кетіп қалғаны туралы хабар келіп түсті. Ер адамдар балық аулауға Павлодардан келгені белгілі. Көлік жағадан 700-800 метр қашықтықта батып кетті», - деп хабарлады ҚР ТЖМ.
Министрлік мәліметінше, 23 наурызда сағат 07:20-да Екібастұз қаласының құтқарушылары іздестіру-құтқару жұмыстарына кірісті. 7 адам, 2 бірлік техника және 1 жүзу құралы жұмылдырылды.
Құтқарушылардың күшімен балықшылардың денелері судан шығарылды.
ТЖМ мұздың қазір өте жұқа екенін және оған шығу қауіпті екенін ескертеді.