Төтенше жағдай кезінде коммуналды қызмет тарифі 7% төмендейді

ҚР Ұлттық экономика министрлігі Табиғи монополияларды реттеу комитеті төтенше жағдай кезінде коммуналды қызмет түрлеріне бағаны арзандатады деп жазады Energyprom.kz. Айта кетейік, Мемлекет басшысы Қасым-Жомарт Тоқаев 23 наурызда аталған қызмет түрлерінің тарифін төмендетуді тапсырған болатын.

Осылайша 2020 жылдың 1 сәуірінен бастап коммуналды қызметтің барлық саласында тариф орта есеппен 7% төмендеді. Атап айтқанда:

• ауыз су — 7,6%;

• кәріз жүйесі — 8,2%;

• жылу —  6,8%;

• электр қуаты— 4%.

Тариф төмендегеннен кейін қазақстандықтар бір айда шамамен 950 млн теңге үнемдейді.

2020 жылдың наурызында коммуналды қызмет ақпан айымен салыстырғанда 0,2%-ға, өткен жылдың наурыз айымен салыстырғанда 2,8%-ға қымбаттаған болатын. ҚР аймақтары арасында бағаның жылдық өсімі Батыс Қазақстан облысында (5,4%), елордада (5,2%) және Атырау облысында (5%) байқалған.

Коммуналды қызмет түрлері арасында 2020 жылдың наурыз айында қоқыс, электроэнергия, орталық жылу қызметі, ыстық су тарифтерінің бағасы өскен. Мәселен, қоқыс жинау қызметінің бағасы өткен жылдың наурыз айымен салыстырғанда — 4,6%, электроэнергия — 4%, орталық жылыту — 1,4%, ыстық су — 1,2% қымбаттады.

Газ, суық су, канализация тарифтері керісінше төмендеген. Өткен жылдың наурыз айымен салыстырғанда көгілдір отын құны 0,2% азайса, суық су — 0,4%, канализация 1,2% арзандады.

Айжан Қалиева, Нұр-Сұлтан