Марат Бекетаев қазан айынан бері қамауда отыр
Бұрынғы әділет министрі Марат Бекетаевты қамауда ұстау мерзімі тағы ұзартылды, - деп хабарлайды Azattyq Ruhy агенттігі.
«Астана қалалық мамандандырылған ауданаралық тергеу соты күдікті Марат Бекетаевқа қатысты қамауға алу түріндегі бұлтартпау шарасын 2024 жылдың 21 қаңтарына дейін ұзартты», - делінген соттың хабарламасында.
Сот Қылмыстық-процессуалдық кодекстің 201-бабына сәйкес басқа деректерді жариялауға болмайтынын атап өтті. Экс-министрдің ұсталғаны қазан айында белгілі болды. Сыбайлас жемқорлыққа қарсы іс-қимыл агенттігінің мәліметінше, бұрынғы әділет министрі қызметін асыра пайдаланып, мемлекетке орасан зор көлемде шығын әкелген. Марат Бекетаев алты жылға жуық Әділет министрі болды. Ол қаңтар оқиғаларынан кейін қызметінен кетті.