Аталған дерек бойынша сотқа дейінгі тергеу басталды
Қостанай облысында зейнеткердің депозитінен 3 млн теңгеге жуық ақшасын қолды қылғандар ұсталды, деп хабарлайды Azattyq Rýhy ҚР ІІМ баспасөз қызметіне сілтеме жасап.
Полицияға 66 жастағы зейнеткер хабарласып, депозитінен ірі сома 2 млн 800 мың теңге ұрланғанын айтқан.
Әйел пәтеріндегі су тазарту сүзгілерін ауыстыруды ұйғарған. Осы жұмыстармен айналысатын екі жігіт оның үйіне бірнеше рет келіп, зейнеткердің жалғыз тұратынын көреді.
Төлем жасау үшін шебер зейнеткердің телефонына банк қосымшасын орнатуды ұсынды. Зейнеткер сенім артып, жеке куәлігін тапсырған. Ол құжатпен жас жігіт тексеруден өтіп, ақшаны депозиттен таныстарының шоттарына аударған.
Зейнеткер ХҚКО-ға жүгінген кезде ғана ақшаның жоғалғанын анықтады. Қылмысты ашумен "Cyber pol" арнайы полиция бөлімшесі айналысқан.
28 жастағы Федоров ауданының тұрғыны ұсталды. Осы уақытқа дейін ол ұрланған ақшаға қымбат заттар мен телефон сатып алып, жұмсап үлгерген. Полицейлер оның бұрын алаяқтық әрекеті үшін қылмыстық жауапкершілікке тартылғанын атап өтті.
ҚР ҚК 190-бабы 2-тармағының 4-тармағы бойынша сотқа дейінгі тергеу басталды.