Енді оларға 5 жыл көлемінде ел аумағына кіруге тыйым салынды
Шығыс Қазақстан облысында заңсыз жұмыс істеп жүрген Моңғолияның 3 азаматы елден шығарылды, деп хабарлайды Azattyq Rýhy.
ШҚО полиция департаменті баспасөз қызметінің мәліметіне сүйенсек, тәртіп сақшылары «Учаске» жедел алдын алу шарасы барысында заңсыз еңбек мигранттарын анықтады.
«Моңғолияның 3 азаматы өңірге мамыр айында келген. Уәкілетті орган беретін тиісті рұқсат құжаттарын алмаған олар Ұлан ауданында түрлі жұмыс істеп жүрді. Аудандық соттың шешімімен шетелдіктер Қазақстан Республикасынан шығарылды. Енді оларға 5 жыл көлемінде ел аумағына кіруге тыйым салынды. Осы ретте, тұрғындарға халықтың көші-қоны саласындағы заңнамасын бұзғандарды қабылдағандар да әкімшілік жауапкершілікке тартылатынын ескертеміз», - делінген ақпаратта.
Жалпы шара барысында полицейлер көші-қон заңнамасын бұзғаны үшін 50-ден астам шетелдікті жауапқа тартты.