Астанада қысқа дайындық жұмыстары басталды

Астанада қысқа дайындық жұмыстары басталды. Бұл туралы Астана қаласының әкімі Жеңіс Қасымбек айтты, деп хабарлайды Azattyq Ruhy.

Оның айтуынша, жылыту маусымы басына дейін жалпы қуаты сағатына 1130 Гкал-ді құрайтын үшінші жылу электр орталығының бірінші кезегімен газ жылу станцияларының құрылысын биыл аяқтайды.

«Қазіргі таңда газға 12 мыңнан астам абонент қосылды. Бірінші және екінші жылу электр орталықтары 16 қазандықтағы газға ауыстырылып, 17 автономды жылу станциялар газға қосылды», - деді әкім.

Сондай-ақ Астана әкімі қалалық ортаны абаттандыруға ерекше назар аударылғанын атап өтті.

«Негізгі қалалық саябақтарды қайта жөндеу, қаланың көшелерін көгалдандыру жұмыстарына кірістік. Биыл жалпы 15 қоғамдық кеңістік пен 150-ден астам аула абаттандырылады. Көгалдандыру мәселесіне де айтарлықтай назар аударылды. Осы жылы 1 миллионға жуық жасыл желек отырғыу жоспарлануда. Оның ішінде 452 мың жасыл желек қалада, қалғаны елорда жанындағы жасыл белдеу аумағында отырғызылады», - деді ол.

Сонымен бірге Жеңіс Қасымбек жыл басынан бері 1 миллион 215 мың шаршы метр тұрғын үй салынғанын мәлімдеді.

«Жыл соңына дейін 3-3,5 млн шаршы метр үй салу жоспарда бар. Бұл шамамен 40 мың пәтер, оның ішінде 6 мың пәтер мемлекет тарапынан халықтың әлеуметтік осал топтарына беріледі», - деді ол.

Оның сөзінше, қазіргі уақытта 14 мектептің құрылысы жүріп жатыр, 11 мектеп жаңа оқу жылы ішінде пайдалануға беріледі.

«Жыл сайын қалада ішкі көші-қон мен бала туу есебінен халық саны артып келеді. Мысалы егер мектепті орта есеппен 8-10 мың түлек бітірсе, жаңа оқу жылында 24-25 мың бала мектеп табалдырығын аттайды. Оқушы орындарымен қамту үшін мектептер салу бойынша жүйелі жұмыс жүргіземіз.

Жаңа оқу жылында 11 мектеп өз есігін айқара ашады. «Жайлы мектеп» ұлттық жобасы аясында 90 мыңға жуық оқушы орнын құрамыз», – деді Астана әкімі Жеңіс Қасымбек.

Мектептер барлық аудандарда, соның ішінде елді мекендерде де салынып жатыр. Жаңа оқу жылында тапсырылатын 11 мектеп, 9 мектеп Алматы, Байқоңыр, Есіл аудандарында орналасатын болады.

Сонымен қатар «Жайлы мектеп» ұлттық жобасы аясында Есіл және Нұра аудандарында 15 мектеп салынады. Мәселен, «Хан-Шатырдың» артында осы бағдарлама бойынша 3 мектеп салу жоспарланып отыр, олар 12 мың оқушы орнын құруға мүмкіндік береді.