Үгіт-насихат кезеңінде партия өкілдері еңбек ұжымдарымен кездесті
Respublica көшбасшыларының, сондай-ақ партиядан депутаттыққа кандидаттардың қатысуымен сайлауалды тур жалғасуда. Үгіт-насихат кезеңінде партия өкілдері еліміздің түкпір-түкпірінде түрлі санаттағы азаматтармен кездеседі. Солардың бірі – кәсіпорындардың еңбек ұжымдары.
Сонымен, бүгін Алматыда республикадан келген үміткерлер 100-ден астам адамды жұмыспен қамтып отырған APR Construction ЖШС құрылыс компаниясының жұмысшыларымен әңгімелесті.
Кездесуге Парламент Мәжілісінің депутаттығына кандидаттар Қырмызы Жандосова, Динара Наумова, Махамбет Хасенов, мәслихат депутаттығына кандидаттар Альбина Сариева мен Арай Еркінұлы қатысты.
Партия өкілдері жұмыс істейтін жастарды қолдаудың, кәсіпкерлерге мүмкіндік берудің маңызын айтты. Мәжіліс депутаттығына кандидат, әлеуметтік кәсіпкер Динара Наумова жас және дарынды қазақстандықтардың көп нәрсені, оның ішінде саясатты да өзгерте алатынына назар аударды.
«Біз шынымен жас партиямыз, мен Respublica партиясының ең жас кандидаты шығармын. Біз саясатқа не үшін бара жатырмыз? Біздің әрқайсымыздың артымызда белгілі бір жетістіктер тарихы бар. Мен облыстағы ерекше балаларға көмектесетін тегін инклюзивті орталық аштым. Менің бүкіл жолым қоғамның қабылдамауымен күресуден тұрады. ДЦП диагнозымен ата-анам мені үш жасымда тастап кетті. Мектепке, кейін университетке қабылданбадым, басқалар сияқты дәріс тыңдай алатынымды, білім ала алатынымды дәлелдедім. Мен үшін Respublica – қолымнан не келетінін дәлелдейтін тағы бір мүмкіндік берді. Осы арқылы мен қоғамға өз үлесімді қоса аламын, қазіргі тәртіпті өзгерте аламын. Меніңше, қазір жастарда барлық мүмкіндік бар. Біз соларды пайдаланып, қоғамды өзгертуіміз керек», – деді Динара өз сөзінде.
Өз кезегінде сөз алған Парламент Мәжілісінің депутаттығына кандидат Қырмызы Жандосова партияның бір бастамасына тоқталып өтті.
«Біз Қазақстандағы кез келген мәселені ашық айта алатын арнайы алаң құруды жоспарлап отырмыз. Әрбір адам осы платформаны кез келген проблемалық мәселесін жариялау үшін пайдалана алады. Мысалы, жұмыссыздық немесе тұрғын үй мәселесі туралы шешілмей жүрген сұрақтарын қоя алады. Дәл қазір біз бүкіл ел тұрғындарымен өздерін нақты не мазалап жатқанын білу үшін өте белсенді түрде сөйлесіп жатырмыз. Сосын оларды шешу жолдарын табуға тырысамыз», – деді Қ.Жандосова.
Алдағы уақытта еліміздің басқа өңірлерінде еңбек ұжымдарымен кездесу өтеді.