Жамбыл облысында прокуратураның көмегімен мүгедек қыздың пәтері қайтарылды
Өтегенованың ауруына байланысты құзыретті органдарға өз бетінше жүгінуге мүмкіндігі болмаған
Жамбыл облысында прокуратураның көмегімен мүмкіндігі шектеулі қызға пәтері қайтарылды, деп хабарлайды Azattyq Ruhy.
Ведомство мәліметінше, балалар үйінің түлегі, 1994 жылы туған 2-топтағы мүгедек қыз ауруына байланысты өз әрекеттеріне жауап бере алмайтын болған. Соның салдарынан сенім білдірген ол 2013 жылы үй сатушысына сенім білдіріп, депозитте жинаған 1 млн теңге қаражатын берген. Оның жағдайын пайдаланған үй сатушысы жатақханада мүлдем тұруға жарамсыз 1 бөлмелі (суық, көгеру, жөндеусіз және есіксіз) пәтерді сатып берген.
«Бөлменің жарамсыздығына байланысты Өтегенова өзінің таныстарымен бірге басқа жерде тұрған, сол кісілердің көмегімен ол жоғарыда көрсетілген 1 бөлмелі пәтерді 2019 жылы сатып жіберген. Сол жылы Өтегенова жетім ретінде кезектілік тәртібімен мемлекеттен «Бәйтерек» шағынауданында жаңа құрылыстар қатарынан 1 бөлмелі пәтер алған. Алайда оның жатақханада 1 бөлмелі пәтердің меншігінде болуы негізінде тұрғын үй комиссиясы оны көшіру туралы атқарушылық іс жүргізуді қозғай отырып, оған жаңа құрылыстан пәтер беру туралы шешімді жойған», - делінген хабарламада.
Айта кетейік, Өтегенова ауруына байланысты құзыретті органдарға өз бетінше жүгінуге мүмкіндігі болмаған, сондай-ақ жақын туыстары мен қамқоршылары мүлдем болмаған.
Оның ауыр жағдайы туралы прокуратура органдарына атқару туралы өндірістерді талдау барысында белгілі болды.
«Шұғыл түрде атқарушылық іс жүргізуді тоқтата тұра, прокуратура органдары дереу қадағалау актілерін енгізіп, Өтегенованың тұрғын үй алуға конституциялық құқықтарын қалпына келтіру жөнінде дер кезінде шаралар қабылдады. Бірінші кезекте, Тараз қалалық сотының 28.01.2022 жылғы шешімімен қыз ауруына байланысты әрекетке қабілетсіз деп танылды және Тараз қаласы әкімдігінің 28.03.2022 жылғы қаулысымен оған қамқоршы тағайындалды. Жатақханадағы бөлмені сатып алу-сату мәмілелерін жасау кезеңінде ол өзінің іс-әрекеттерінің маңыздылығын және олардың салдарын түсіне алмағандығын ескере отырып, сотқа оларды жарамсыз деп тану туралы талап арыз берілді», - делінген прокуратура хабарламасында.
Тараз қалалық сотының 11.11.2022 жылғы шешімімен талап толық көлемде қанағаттандырылды, бұл 01.02.2023 жылы тұрғын үй комиссиясының жаңа құрылыста бұрын берілген Өтегенованың пәтерін қайта қайтару туралы оң шешімін қабылдауға негіз болды. Оны көшіру туралы шешім жойылды.
