Мемлекеттік сатып алуда 632 млрд теңге үнемделді – Қаржы вице-министрі

2022 жылдың қорытындысы бойынша мемлекеттік сатып алу көлемі 5,9 трлн астам теңгені құрап, мемлекеттік сатып алулардағы шартты үнемдеу 632 млрд теңгені құрады. Бұл туралы бүгін Орталық коммуникациялар қызметінде өткен брифинг кезінде Қаржы вице-министрі Дәурен Кеңбейіл мәлім етті, деп хабарлайды Azattyq Ruhy.

Айта кетейік, былтыр Қазақстанда «Квазимемлекеттік сектордың жекелеген субъектілерінің сатып алуы туралы» жаңа Заң қолданысқа еніп, «Мемлекеттік сатып алу туралы» қолданыстағы Заң жаңарған.

«Мемлекеттік сатып алу жүйесін жетілдіру шеңберінде бәсекелестікті дамытуға, сыбайлас жемқорлық тәуекелдерін азайтуға және сатып алу процестерін жеңілдетуге бағытталған бірқатар заңнамалық шаралар қабылданды. Осының арқасында, 2022 жылғы 1 шілдеден рейтингтік жүйе енгізілді. Бұл әдіс конкурстық комиссия мүшелерінің қатысуын болдырмайды және сатып алу жеңімпазын автоматты түрде анықтайды. Екіншіден, сатып алуды онлайн режимінде жүзеге асыруға мүмкіндік беретін электрондық дүкен енгізілді»,- деді вице-министр.

Бұдан өзге, Дәурен Кеңбейіл атап өткендей, конкурс түріндегі сатып алудың жаңа тәсілі енгізілді. Бұл әдіс сатып алу процедураларын 2 айдан 30 күнге дейін қысқартты.

«Және бір көзден сатып алудың 7 негізі алынса, тағы 8 негіз қайта қаралды. Бұның барлығы мемлекеттік сатып алу сайтының ашықтығы мен тиімді жұмысын қамтамасыз етуге бағытталған шаралар», - дейді вице-министр.