Алматыда шетелдік көліктерді заңдастыру қалай өтіп жатыр
23 қаңтарда еліміздің барлық мамандандырылған ХҚКО-ларында заңдастыру басталған болатын
Алматыда автокөлікті жария етуге берілген 10 327 мың өтінімнің 1649-ы мақұлдама алып, арнайы рәсімнен өтті. Бұл туралы Алматы қаласы Полиция департаменті Әкімшілік полиция басқармасы бастығының орынбасары Болатбек Баятанов мәлімдеді, деп хабарлайды Azattyq Ruhy.
23 қаңтарда еліміздің барлық мамандандырылған ХҚКО-ларында заңдастыру басталған болатын.
«Жария ету қағидалары өтініштердің екі жолын көздейді: Арнайы ХҚКО арқылы және электрондық үкімет порталы арқылы. Жария етудің негізгі шарттары: көлік құралдарына оларды бастапқы мемлекеттік тіркегені үшін 200 000 теңге мөлшерінде ставка қолданылады», - деді Алматы қаласы Полиция департаменті Әкімшілік полиция басқармасы бастығының орынбасары Болатбек Баятанов.
Бұл ретте көлік құралы мынадай талаптарға сай болуы тиіс:
1. ҚР аумағына 2022 жылдың 1 қыркүйегіне дейін әкелінген болуы керек;
2. Іздеуде жоқ;
3. Бұрынғы тіркеу орны бойынша мемлекеттік есептен алынған;
4. Кедендік тазартудан өткен.
Болатбек Баятановтың айтуынша, автокөлікті қысқа мерзімде заңдастыруға болады. Өтінішті қарау және шешім қабылдау мерзімі 2 күн. Ал қазір Алматының арнайы ХҚКО-ларында кезек жоқ.
Естеріңізге сала кетейік, 2022 жылдың 1 қыркүйегіне дейін елге әкелінген және тіркеуден өтпеген автокөліктерді біржолғы жария ету Мемлекет басшысының тапсырмасына байланысты жүргізіліп жатыр.
