Соңғы 5 жылдың ішінде елде бала туудың өсуі байқалды
Өткен жылы Қазақстанда ана өлімінің едәуір – 3,2 еседен астам қысқарғаны байқалды, нәресте өлімінің деңгейі пандемияға дейінгі деңгеймен және 2021 жылмен салыстырғанда 6,0%-ға төмендеді, деп хабарлайды Azattyq Ruhy Денсаулық сақтау министрлігінің баспасөз қызметіне сілтеме жасап.
«Бұл көрсеткіштерге бірқатар бағыттар бойынша қабылданған кешенді шаралардың арқасында қол жеткізілді. Сонымен, пренаталдық бақылаумен қамту күшейтілді, ол 99,2% -ды құрады, жүкті әйелдерді 12 аптаға дейін ерте қамту 5%-ға өсті және 89,5% -ды құрады, пренаталдық ультрадыбыстық скринингпен қамту 5%-ға, биохимиялық скринингпен қамту 10%-ға ұлғайды, сондай-ақ балаларды 1 жасқа дейін проактивті бақылаумен және скринингпен қамту 81%-ға дейін ұлғайды», - делінген хабарламада.
Жүкті әйелдер мен жаңа туған нәрестелерге білікті медициналық көмек көрсету үшін 18 ұрықты сақтау орталығы ұйымдастырылды, пренаталдық диагностика бойынша 150-ден астам ультрадыбыстық маман оқытылды.
Бір жылдың ішінде Министрліктің мамандары аналардың сырқаттанушылығы мен өлімін төмендету мақсатында ауыр жағдайдағы жүкті, босанатын және босанған әйелдерге күнделікті мониторинг жүргізді.
«2022 жылы «Ұлттық шұғыл медицинаны үйлестіру орталығының» ресурстарын пайдалана отырып, ғылыми және республикалық клиникалардың профессорларымен және жетекші бейінді мамандарымен бірлесіп жүктілік және босану ағымы асқынған 910 әйелге 1391 медициналық қызмет көрсетілді. Санитариялық авиациямен 200 ұшу орындалды; 21 әйелге операция жасалды, ауыр жағдайда 180 пациент облыстық және республикалық клиникаларға жеткізілді», - делінген хабарламада.
Осылайша, қабылданған шаралардың нәтижесінде ауыр жағдайдағы әйелдердің 1237 немесе 96% құтқарылды.
«Соңғы 5 жылдың ішінде елде бала туудың өсуі байқалды, ол 2021 жылы 446 мың бала дүниеге келген кезде ең жоғары деңгейге жетті, 2022 жылы 412 мың нәресте дүниеге келді. Неонаталдық хирургияның дамуымен және осы технологиялардың өңірлерге ауысуымен туа біткен ақаулары бар жаңа туған нәрестелердің өмір сүру деңгейі 86% құрады. Орташа алғанда, жыл сайын туа біткен ақаулары бар 1500 жаңа туған нәресте хирургиялық ем алады. Еліміздің балалар халқына медициналық көмек көрсетуге 3 232 педиатр, 773 неонатолог және 1 395 балалар анестезиолог-реаниматологы жұмылдырылды», - дейді мамандар.
Айта кетсек, Қазақстан – Орталық Азияда туғаннан бастап кардиохирургиялық операциялар жүргізілетін жалғыз мемлекет.
«2022 жылы туа біткен жүрек ақаулары бар балаларға 1800-ден астам ашық жүрекке операция, оның 75%-ы бір жасқа дейінгі балаларға жасалды. Мастер-класс шеңберінде Германия мен Түркиядан шетелдік мамандарды тарта отырып, күрделі ақаулары бар 24 балаға операция жасалды. Аса ауыр жағдайларда балалардың өмірін құтқару үшін Қазақстанда телемедициналық технологиялар мен медициналық авиация іске асырылды. Санавиацияның 497 ұшуы, оның ішінде жаңа туған нәрестелерге 271 ұшу орындалды, 1072 балаға медициналық көмек көрсетілді», - дейді ДСМ өкілдері.
Мемлекет басшысының тапсырмасына сәйкес Қазақстан Республикасында ана мен бала денсаулығын сақтау жөніндегі тұжырымдама бекітілетінін естеріңізге сала кеткен жөн.
Денсаулық сақтау министрлігінің алдағы жоспарларында неонаталдық көмек көрсетуді ұйымдастырудың жаңа стандартын енгізу және босандыру және балалар бойынша диагностика мен емдеудің клиникалық хаттамаларын өзектендіру тұр. Сондай-ақ, министрлік 11 заманауи перинаталдық орталық салу мәселесін қарады, осыған байланысты жобалау-сметалық құжаттаманы әзірлеу жұмыстары басталады.
Бұдан басқа, қазіргі уақытта жұмыс істеп тұрған клиникалардың базасында 5 өңіраралық балалар кардиохирургиясы орталығын құру бойынша жұмыс жүргізілуде, бұл балаларға кардиохирургиялық операциялардың қолжетімділігін арттыруға мүмкіндік береді.
Балаларға арналған 13 ерте араласу орталығын, 17 аудандық және 6 облыстық оңалту орталығын ашу жоспарланып отыр.
Айта кетейік, ҚР Премьер-министрінің орынбасары Алтай Көлгінов Instagram парақшасында медицина саласында атқарылып жатқан шаруалар туралы айтып өткен болатын.
«Еліміздің өңірлері мен шалғай ауылдарында 2023-2025 жылдар аралығында 655 алғашқы медициналық-санитарлық көмек нысаны салынады. Өздеріңізге мәлім, ауылдар мен шалғай аудандардың тұрғындары медициналық көмек алу үшін алыс жолдарды жүріп өтіп, облыс орталықтары мен қалаларға баруға мәжбүр. Осыдан кейін медициналық көмекті уақытылы алу туралы айтудың өзі артық.
Осылайша өңірлердегі 655 медициналық нысанның ішінде 253 медпункт, 160 дәрігерлік амбулатория, 242 фельдшерлік-акушерлік пункт салынады. Мәселен Қарағанды облысында 92 алғашқы медициналық-санитарлық көмек нысанын, Абай облысында 65 нысанды, Жетісу облысында 59 нысанды, Ақмола және Алматы облыстарында 38 нысанды және т.б. салу жоспарланып отыр», - деген Алтай Көлгінов.