Сенат Мәжіліске цифрлық майнингтердің қызметін реттейтін заң жобасын қайтарып берді

Сенатор Бекболат Орынбеков «Қазақстан Республикасындағы цифрлық активтер туралы» Қазақстан Республикасының заңы жөнінде баяндама жасады, деп хабарлайды Azattyq Ruhy.

«Цифрлық технологияларды қолдану, әзірге дамудың бастапқы кезеңінде болса да, цифрлық активтер индустриясын дамыту, алдағы онжылдықтарда дәстүрлі басымдықтарды өзгертеді. Сондықтан осы саланы реттеу тетіктерін, алдын-ала қарастыру өте маңызды.Осыған орай Мемлекет басшысының цифрлық майнингті және осындай активтер айналымын құқықтық реттеу мен елімізде криптовалюта экожүйесін құру мәселелерін шешу жөніндегі тапсырмаларын орындау мақсатында Парламент депутаттары әзірлеген заңдардың бірыңғай топтамасында «Қазақстан Республикасының цифрлық активтері туралы» және оған ілеспе 3 заңға өзгерістер мен толықтырулар енгізу туралы құжаттар бар», - деді Бекболат Орынбеков.

Сенатор атағандай, «Қазақстан Республикасының цифрлық активтері туралы» Сенаттың тұрақты комитеттерінен ескертулер мен ұсыныстары түскен жоқ.

Алайда, талқылау барысында бас комитеттің, Мәжіліс қабылдаған заңға мынадай өзгерістер енгізу қажеттілігі туындаған. Олар:

•  цифрлық майнинг бойынша қызметті жүзеге асыруға лицензиялардың кіші түрлерінің атауларын нақтылау;
•  цифрлық майнинг қызметін жарнамалауға қатысты нормаларды алып тастау, өйткені олар «Жарнама туралы» Заңда және «Әкімшілік құқық бұзушылық туралы» Кодексте көзделген;
•  заң нормаларын қолданысқа енгізу мерзімдерін нақтылау.

«Барлық ескерту мен ұсыныс салыстырмалы кестеде келтірілген. Осыған орай, комитет Қазақстан Республикасы Конституциясының 61-бабының 4-тармағына сәйкес Заңның жекелеген баптарын мақұлдамауды және оларды жаңа редакцияда көрсете отырып, Мәжіліске қайтаруды ұсынады», - деді ол.

Депутаттар дауыс беру арқылы аталған заң жобасындағы жекелеген баптарға өзгертулер енгізу үшін Мәжіліске қайтарды.