Норвегия хоккей қауымдастығы (NIHF) аталмыш доданы өткізуден ресми түрде бас тартқан
Қазақстан мен Германия хоккейден 2027 жылғы әлем чемпионатын өткізу құқығы үшін таласады. Өйткені Норвегия әлем біріншілігін өткізу туралы өтінішін қайтып алды, деп хабарлайды Azattyq Rýhy Сhampionat.com сайтына сілтеме жасап.
Норвегия хоккей қауымдастығы (NIHF) аталмыш доданы өткізуден ресми түрде бас тартқан.
Мұндай шешім Норвегия үкіметі тарапынан қаржы бөлінбеуіне байланысты қабылданған. Елдің мәдениет министрлігі турнирді Берум мен Тронхеймде өткізуді қарастырған өтінімді қаржыландырудан бас тартқан.
Норвегия бұдан бұрын шайбалы хоккейден 1999 жылғы әлем чемпионатын қабылдаған болатын.
Норвегия хоккей қауымдастығы мұндай шешімге өкініш білдіре отырып, алдағы уақытта қаржыландыру мәселесін әріптестерімен бірге шешуге мүдделі екендігін мәлімдеді. 2028 жылғы біріншілікті өткізу жөнінде жаңа өтінім беру бағытында жұмыс басталады.
Ал Германия мен Қазақстан 2027 жылғы әлем чемпионатын өткізу құқығын иелену жолындағы күресті жалғастырады. Халықаралық шайбалы хоккей федерациясы аталған біріншіліктің иесін 2023 жылғы мамыр айында өтетін конгресінде анықтайтын болады.