ШҚО-да 12 ресейлік қар құрсауынан құтқарылды

ШҚО-да құтқарушылар Ресей Федерациясының 12 азаматын қар құрсауынан эвакуациялады. Бұл туралы Azattyq Ruhy өңірлік ТЖД-ның баспасөз қызметіне сілтеме жасап хабарлайды.

Шемонаиха ауданында «Өскемен-Шемонаиха-РФ шекарасы» республикалық маңызы бар автожолда қалған 12 адам қолайсыз ауа райына тап болды.

Оларға көмекке ШҚО ТЖД Жедел-құтқару жасағының құтқарушылары жол талғамайтын «ТРЭКОЛ» автокөлігімен жетті. Ресей Федерациясының 12 азаматы, оның ішінде 2 бала қауіпті аймақтан эвакуацияланды. Олар Шемонаиха қаласының қонақ үйіне орналастырылды.

Қазіргі уақытта өңірде 15 автожол жабық күйінде қалып отыр.

«ШҚО ТЖД азаматтардан ауа райы тұрақтанғанша алыс жолға шықпауды сұрайды. Тәуекелге бармаңыз және өміріңізге қауіп төндірмеңіз. Аймақта 6 қаңтарда дауылдық туралы ескерту жарияланған: түтек боран, көктайғақ», - делінген ведомство хабарламасында.