Димаш Құдайберген «Болашақ» бағдарламасының иегері атанды

Республикалық комиссия шешімімен осы жылдың үшінші легінде стипендия 178 адамға тағайындалды. Оның ішінде 78 адам әлемнің үздік жоғары оқу орындарының магистратурасына, 6 адам докторантурасына түсті. 110 стипендиат «Тағылымдама» бағдарламасы бойынша біліктілігін арттырады, деп хабарлайды Azattyq Ruhy.

«Болашақ» стипендиясының иегерлері әлемнің 20 мемлекетінде академиялық білім алады және тағылымдамадан өтеді. 93 адам АҚШ-тың, 47 адам Ұлыбританияның және өзге елдердің жоғары оқу орындарында білім алады. Биыл Мемлекет басшысының тапсырмасы аясында «Болашақ» бағдарламасын қайта бағдарлау процесі іске қосылды. Басымдық инженерлік-техникалық кадрларды даярлауға беріледі.2023 жылы стипендиаттардың басым көпшілігі инженерлік-техникалық бағыттар бойынша шетелде дайындықтан өтеді», - деп хабарлады бағдарламаның  баспасөз қызметі.

Тізімде 106-нөмірде Құдайберген Дінмұхаммед Қанатұлы бар. Azattyq Ruhy тілшісіне «Болашақ» халықаралық бағдарламалар орталығы оның танымал әнші Димаш Құдайберген екенін растады.

Естеріңізге сала кетейік, 27 желтоқсанда Қазақстан Республикасының Мемлекеттік кеңесшісі Ерлан Қариннің төрағалығымен Шетелде кадрлар даярлау жөніндегі республикалық комиссияның кезекті отырысы өтті.

«Болашақ» халықаралық стипендиясы иегерлерінің тізімі Халықаралық бағдарламалар орталығының сайтында жарияланған.