Олардың арасында әсіресе, зейнеткерлер көп
Қарағандыдағы сайлау учаскелеріне дауыс беруге келіп жатқандардың басым бөлігі үлкен кісілер. Бұл туралы Azattyq Ruhy тілшісіне шаһардағы №12 сайлау учаскесінің бақылаушысы Нұрлан Наурызов айтты.
Аталған сайлау учаскесіне барлығы 2 жарым мыңнан астам адам тіркелген. Қазірдің өзінде 800-ге жуық азамат өз таңдауын жасап үлгерген екен.
«Аталған сайлау учаскесіне келіп жатқандардың басым бөлігі, шамамен 70 пайызы - үлкен кісілер. Олардың ішінде әсіресе, зейнеткерлер көп. Жастар әзірге аз. Олар түстен кейін келетін шығар деген ойдамын. Сайлау учаскесі таңғы сағат 6-дан бастап жұмысын бастады. Құжаттарды әзірлеу кезінде ешқандай заң бұзушылықтар болған жоқ. Дауыс берушілердің алғашқы легі таңғы 7-ден бастап келді. Барлық процесс ойдағыдай өтіп жатыр. Бақылаушылар тарапы ешқандай заң бұзушылықты көрген жоқ», - деді Нұрлан Наурызов.
Айта кетерлігі, Нұрлан Наурызов президенттікке үміткер Жигули Дайрабаевтың сенімді өкілі. Осы ретте Azattyq Ruhy тілшісі кандидаттың сайлау кезіндегі көңіл-күйін сұрап білді.
«Ол кісінің кімге дауыс бергені белгілі деп ойлаймын. Жигули Молдақалықұлында бәрі жақсы, ешқандай толқу жоқ, барлығы ойдағыдай болып жатыр. Көңіл-күйі де жақсы», - деді Жигули Дайрабаевтың сенімді өкілі.