Алматыда 600 сайлау учаскесі жұмыс істеп жатыр
ҚР Еңбек сіңірген қайраткері, ҚХА мүшесі Асылы Осман Алматы қаласындағы №64 сайлау учаскесіне барып, елдің тағдырына ықпал етер маңызды шешімді қабылдауға атсалысты. Әрбір сайлаудағыдай бұл жолы да алғашқылардың бірі болып дауыс берді, деп хабарлайды Azattyq Ruhy.
«Бұл сайлау елдің тағдырын айқындайды. Қабанбай бабамыз айтыпты «Хан біреу, қалғандарымыз тіреу болсын» деп. Қарақтарым осы сөздің құдіретіне ештеңе жетпейді. Сондықтан бүгін тайлы-тұяғымызбен өз таңдауымызды жасадық. Елдің алдында жүрген аға буын өкілдері өздерінен кейінгілерге үлгі-өнеге көрсететін шақ келді. Сайлаудан, келешектен жақсылықты күтемін», - деді Асылы Осман.
Айта кетейік, Алматыда 600 сайлау учаскесі жұмыс істеп жатыр. Ал қалада 1 миллион 176 мыңнан астам адам дауыс беруге құқығына ие. Сайлау учаскелері жергілікті уақыт бойынша сағат 7:00-ден 20:00-ге дейін жұмыс істейді. Тұрғылықты тіркеуі жоқ алматылықтар арнайы ашылған учаскелерге барып, таңдау жасай алады.