Ақтөбеде полицейге пара бермек болған жүргізушіге қатысты қылмыстық іс қозғалды
Ол әкімшілік жауапкершіліктен құтылу үшін полицияға пара ұсынған
Ақтөбе қаласының тұрғынына полиция қызметкеріне пара беруге тырысқаны үшін қылмыстық іс қозғалды, деп хабарлайды Azattyq Ruhy.
Ақтөбе қаласында полиццейлер жол ережесін бұзғаны үшін 25 жастағы жүргізушіні тоқтатқан. «Kia CEED» автокөлігін басқарған жас жігіт белгіленген талаптарды сақтамағаны үшін әкімшілік жауапкершіліктен құтылмақ болып полицияға пара ұсынды.
«Полиция қызметкері қызметтік борышын атқара отырып, ақшадан бас тартты. Принципті берік ұстанған полицей сыбайлас жемқорлық қылмысы туралы өзінің тікелей басшылығына және Өзіндік қауіпсіздік басқармасына хабарлаған. Қазіргі уақытта аталған факті бойынша ҚР ҚК 367-бабының 1-бөлігімен «Пара беру» бойынша сотқа дейінгі іс қозғалып, тергеу әрекеттері жүргізілуде», - деп көрсетті Ақтөбе облыстық ПД баспасөз қызметі.
