Ол жағдайы ауыр науқас жансақтау бөліміне бірнеше сағат бойы кіре алмағаны үшін сынға ұшыраған еді
Сынның астында қалған Павлодар облыстық балалар ауруханасының бас дәрігері жұмысынан босатылды, деп хабарлайды Azattyq Rýhy Экспресс К сайтына сілтеме жасап.
«Ардақ Күзеков қызметінен өз қалауы бойынша кетті. 1 қарашадан бастап жұмыстан босату туралы өтініш жазды», - делінген облыстық Денсаулық сақтау басқармасы мәліметінде.
Ол бес жастағы, жағдайы ауыр науқас Әл-Тайыр Ихсанов жансақтау бөліміне бірнеше сағат бойы кіре алмағаны үшін сынға ұшыраған еді. Аурухана басшылығының немқұрайлылығы көпшіліктің ашуын келтірді. Олар бас дәрігердің отставкаға кетуін талап еткен болатын. Баланың анасы Әл-Тайырдың ахуалы әлі ауыр екенін айтады.
«Егер жансақтау бөлмесіне уақытылы жатқызылғанда мұндай зардабы болмас еді. Бірер күнде баламның миына күрделі ота жасалады», - дейді әйел.
Желі тұтынушыларының наразылығы басқарманың Instagram-дағы парақшасына экс-басшы туралы ақпарат шыққан соң тіпті өрши түсті. Онда дәрігердің министрліктен және BalaJan медицина қызметкерлері кеңесінен «Алтын тақта» сыйлығын және «Ана мен балаға мейіріммен қарайтын аурухана» мәртебесін алғаны жазылған.