Қазақстанның SMIIC ұйымына қатысу мақсаты – ислам әлемінің кәсіпкерлерімен кедергісіз жұмыс істеу – Қайсар Шалабаев

Бүгін Алматыда Ислам елдерінің стандарттары мен метрологиясы институты (SMIIC) метрологиялық кеңесінің 11-ші отырысы басталды. Жиынға 35 елден делегаттар қатысып, метрология, техникалық реттеу және халал индустриясы мәселелерін талқылайды. Сондай-ақ Орталық Азия өңірі үшін халал аудиторлар тренингі өткізіліп жатыр, деп хабарлайды ҚР СИМ Техникалық реттеу және метрология комитетінің баспасөз қызметі.

Іс-шараның ашылуында ҚР СИМ Техникалық реттеу комитеті төрағасының орынбасары Қайсар Шалабаев құттықтау сөз сөйледі. Ол кеңестің бүгінгі отырысы саудадағы техникалық кедергілерді жоюға, сондай-ақ OIC елдеріне экспортты ілгерілетуге ықпал ететінін атап өтті.

«Қазақстанның бұл ұйымға қатысу мақсаты – ислам әлемінің кәсіпкерлерімен жұмыс істеу кезінде отандық өндірушілер үшін сауда кедергілерін азайту. Мысалы, биыл мамыр айында ҚР СИМ ТРМК «ҚазСтандарт» ұйымы Халал өнімдерін сертификаттау үшін БАӘ халықаралық аккредиттеу орталығынан аккредитациядан өтті. Бұл қадамдар еліміздің халықаралық нарықтағы орнын нығайтуға мүмкіндік береді», - деді Қ.Шалабаев.

Ислам ынтымақтастығы ұйымы жанынан құрылған ислам елдерінің стандарттар және метрология институты (SMIIC) мүше мемлекеттермен ынтымақтастықта OIC / SMIIC стандарттарын әзірлеумен айналысатынын атап өтеміз.

Ұйым 1999 жылы 7 қарашада құрылды және оған 42 мемлекет мүше. Қазіргі уақытта SMIIC-те әртүрлі салаларда 18 техникалық комитет бар және олар 35 стандарт әзірледі.

SMIIC-тің толыққанды мүше ретіндегі жұмысына қатысу Қазақстанның стандарттау және метрология саласындағы мүдделерін ілгерілетуге, халал-индустрияны дамытуға, мүше елдер арасында елдің имиджін нығайтуға, сондай-ақ SMIIC-ке мүше елдерге тауарларды ілгерілетуде отандық экспортқа жәрдемдесуге мүмкіндік береді.

Айта кетейік, Ислам елдерінің стандарттары мен метрологиясы институты (SMIIC) Ислам Ынтымақтастығы Ұйымының (ИЫҰ) ведомстволық бағынысты ұйымы болып саналады. Штаб-пәтері Ыстамбұлда (Түркия) орналасқан.

2018 жылғы 4 қарашада Мекке қаласында Ислам мемлекеттерінің Стандарттар және метрология институты Директорлар кеңесінің отырысы өтті, оның барысында Техникалық реттеу және метрология комитеті ұсынған Қазақстан бұл ұйымның толыққанды мүшесі атанды.