Енді студенттер сынақ кітапшасы үшін ақша төлемейді
Қазақстан Республикасы Білім және ғылым министрлігімен студенттердің, магистранттар мен докторанттардың сынақ кітапшаларын алып тастау бойынша бұйрық әзірленді. Бұл оқу үрдісін жеңілдетіп, бюрократияны айтарлықтай төмендетеді деп хабарлайды Azattyg ryhy Білім және ғылым министрлігінің баспасөз қызметіне сілтеме жасап
Ал қағаз кітапшаларының орнын электронды жүйе алмастырады.
«Бүгінгі таңда еліміздің жоғары оқу орындарының ақпараттық жүйесінде, кейін транскриптте белгіленетін, студенттердің, магистранттар мен докторанттардың оқу жетістіктерінің тарихи деректері жүргізіліп жатады. Транскрипт студенттің сұранысы бойынша оқудың кез келген кезеңінде беріледі», - делінген баспасөз мәлімдемесінде.
Сондай-ақ, бұл жаңашылдық студенттердің ақшасын да үнемдейді.
«Бұл жаңалық 604 345 студент, 35 690 магистрант және 6 363 докторантқа қатысты. Айта кеткен жөн, бір сынақ кітапшасының құны орташа есеппен 380 теңгені құрайды. Жалпы, цифрландыру заманында барлық білім беру жүйесі біртіндеп онлайн-форматқа көшуде»,-делінген хабарламада.