Алматы көгінде ең үлкен ту қалықтады

Республика күніне арналған алып байрақ Алматы аспанында қалықтады. Әлемдік рекорд орнатқан кәсіби парашютист Қазақстан Республикасының ең үлкен мемлекеттік туымен үш мың метр биіктіктен секірді, деп хабарлайды Azattyq Ruhy.

Байрақтың көлемі 800 шаршы метр. Бұл қазіргі таңда елдегі ең үлкен ту. Астанадағы бас флагштоктағы байрақтың көлемі - 450 шаршы метр. Ту осы ерекше оқиға үшін арнайы дайындалып, нәтижесінде Қазақстанның рекордтар кітабына енді.

«Бүгін біз Алматы аспанында мемлекеттік байрағымыз түріндегі шынайы суретке куә болдық. Мен осы сәтті көзіммен көріп, елімнің ынтымағы мен асқақтығының рухын сезіну бақытына ие болдым», - деді Қазақстан рекордтар кітабының өкілі Қуандық Құдайбергенов.

Науқанды ұйымдастырған кәсіпкер Жомарт Қияс бастаған белсенді топ болатын. Олардың бастамасын түрлі сала өкілдері, бей-жай қала алмайтын Қазақстан азаматтары қолдады. Бұл адамдар еліміздің мәдени-спорттық және экономика салаларын дамытып қана қоймай, әлеуметтік және қоғамдық өміріне де ат салысып жүр. Жомарт Қиястың айтуынша, бұл науқанның мақсаты – барша қазақстандықтың патриоттық рухын көтеріп, нығайту еді, сонымен бірге - ұлтына, дүниетанымына қарамастан бірі біріне төзімділік танытуды дәріптеу болатын.

«Көптеген адам үшін қазір тап Қазақстан тыныштық пен бейбітшіліктің тұғыры болып тұр, мұны барлық халықаралық қауымдастық өкілдері растайды. Ең үлкен байрақтың аспанда қалықтауында терең мән бар, ол ашық аспан астындағы еліміздегі барлық халықтардың ынтымағын білдіреді», - деді ол.

Осы науқанды қолдағандардың бірі Құрманбек Жұмағалидің сөзінше, мұндай шаралар өткізу азаматтардың өз елінің әлеуметтік-экономикалық жетістіктерін мақтан тұтуына сеп болып, өскелең ұрпақты Тәуелсіздік нышандарын құрметтеуге тәрбиелейді.

Шараның ұраны болған «Ашық Аспан» деген сөзде тұтастық, қазақстандықтардың бейбіт аспаны деген мән жатыр. Бұл сөз - бейбітшілікті қорғауды, Қазақстан Республикасы тұрғындарының бақуатты өмірінің баянды болуын насихаттайды.

Әлеуметтік шараны сонымен бірге Ескендір Ибрагим, Темір Спатаев, Әлжан Дәрменов, Тойбек Мырзабеков, Ардақ Назаров, Жаңқош Тұраров сынды азаматтар қолдады.