Атырау облысында қиыршық тас тиелген үш жүк вагоны рельстен шығып кетті

Атырау облысында қиыршық тас тиелген үш жүк вагоны рельстен шығып кетті. Бұл туралы Атырау облысының өңірлік коммуникация қызметі мәлім етті, деп хабарлайды Azattyq Rýhy.

Оқиға 18 қазан күні сағат 11:15 шамасында болған. Абырой болғанда, вагондар аударылмай аман қалды.

«Мақат ауданындағы Доссор стансасында «Dossor Processing Company» жауапкершілігі шектеулі серіктестігіне тиесілі тоғыз вагонның үшеуі рельстен шығып кетті. Жүк вагондарын сүйреген тепловоз Мақат стансасынан Доссор стансасы бағытына жолға шыққан. Жүк пойызындағы тоғыз вагонның бәріне қиыршық тас тиелген», — делінген хабарламада.

Болған жағдай пойыздардың қозғалысына кері әсерін тигізбеді. Оқиға салдарынан ешкім зардап шеккен жоқ.