Тамыз айында 96,9 мың бірлік автокөлік есепке қойылды – Ұлттық статистика бюросы

Осы жылдың тамыз айында елімізде 96,9 мың бірлік автокөлік құралы есепке қойылды, бұл өткен жылдың сәйкес кезеңімен салыстырғанда 10,6% кем. Оның ішінде тіркеуге қойылған жеңіл автомобильдердің саны 11,7%-ға азайса, керісінше жүк автомобильдерінікі 7,7%-ға, автобустардікі 31,4%-ға артты. Бұл туралы Ұлттық статистика бюросы хабарлады.

Мәселен, 2022 жылғы 1 қыркүйектегі жағдай бойынша Қазақстанда тіркелген автокөлік құралдарының саны  4 377,7 мың бірлікті құрады, оның 87,7%-ы жеңіл автомобильдер, 10,4%-ы жүк автомобильдері және 1,9%-ы автобустар.

2022 жылғы 1 қыркүйектегі жағдай бойынша республикада жеке тұлғалардың меншігінде 3 630,9 мың жеңіл автокөлік бар. Олардың ең көп үлесі Алматы облысы (465,7 мың бірлік), Алматы қаласы (460,3 мың бірлік) және Шығыс Қазақстан облысының (275,9 мың бірлік) жеке тұлғаларына тиесілі.

20 жылдан аса шығарылған жеңіл автомобильдер Алматы облысының (317,6 мың бірлік), Алматы қаласының (194 мың бірлік) және Қарағанды облысының (156,4 мың бірлік) жеке тұлғаларында басым. Шығарылған жылы 3 жылдан аспайтын жеңіл автомобильдер Алматы (50 мың бірлік) мен Астана қалаларының (46,7 мың бірлік) және Қарағанды облысының (18,8 мың бірлік) жеке тұлғаларының меншігінде.