Үрей мен үміт: Петропавлда жылыту маусымы қалай басталды?

Алдағы жылыту маусымы – Петропавл тұрғындарын алаңдатып отырған басты мәселелердің бірі. Естеріңізге сала кетсек, биыл наурыз айында қаладағы жалғыз жылу орталығының алып мұржасы құлап, тұтас шаһар қатып қала жаздаған болатын. Жағдайды жылы ауа райы ғана құтқарып қалды. Маусымның басында мұржаны бұзуға кіріскен мамандар әлі күнге жұмыс істеп жатыр. Себебі алып нысан механикалық жолмен бұзылды. Қазір бетон қалдықтары жиналуда. Петропавл жылу орталығы алдағы қысты 2 мұржа және 9 қазандықпен өткергелі отыр. Қала әкімі қаулы шығарып, жылыту маусымының басталуы 24 қыркүйек күніне белгіленді. Алдымен әлеуметтік нысандарға жылу берілуде. Одан кейінгі кезекте мыңнан астам көпқабатты үй тұр. Монополист компания басшылығы қиындықтарға қарамастан бәрі жақсы болатынын айтады. Ал халықтың көңілінде үрей басым.

«АПАТҚА БҰРЫНҒЫ БАСШЫЛЫҚ АЙЫПТЫ...»

Петропавл жылу орталығы 1960 жылы іске қосылған. Содан бері кешенді жөндеу жұмыстары жүргізілген емес. Кәсіпорын қондырғыларының 70 пайыздан астамы тозған. Әбден ескірген техника өткен жылыту маусымында бірнеше рет сыр берді. Жылу қазандықтары қайта-қайта істен шығып, қала тұрғындары мен компания ұжымын әуреге салды. Апаттан кейін ғана инвестор нысанды жөндеу жұмыстарына 17 млрд теңге бөлді.

Зоя Стреляева ұзақ жылдар бойы стратегиялық нысанда қызмет еткен. Қазір зейнетте. Маман компанияның мұндай мүшкіл жағдайға жетуіне бұрынғы басшылықтың салғырттығы себеп болғанына сенімді.

«Жылу орталығында қондырғылардың істен шығуы жиі болып тұрады. Бір жері түзеліп жатса, екіншісі күзеледі. Мәселен кейде алып қондырғыларды ішке кіргізу үшін ғимараттың қабырғасы тесіледі. Алайда ол тиісті деңгейде қалыпқа келтірілмейді. Өзім белгіленген учаскені аралап, ақауларды қағазға түсіріп, басшылыққа беретінмін. Біздің жұмысымыз зая кететін деуге болады. Ақаулар жөнделмейтін. Жақсы жұмыс істеу үшін емес, бәрі қаржыны үнемдеу үшін істеліп жатқандай. Қыста болған апатқа бұрынғы басшылық айыпты. Сол кезде компанияға басшылық еткен Барин мен Татарин еді. Тексерістің барлығын тереңнен бастау керек. Жұмысшыларға да жағдай жасалмайды. Жалақысы аз. Сондықтан жастар ондай нысанға бармайды», - дейді Зоя Стреляева.

ЖҰМЫСҚА 10 МЕРДІГЕР КОМПАНИЯ ТАРТЫЛДЫ

Апат кезінде 37 жылғы әйел қайтыс болған еді. Прокуратура аталған фактіге қатысты қылмыстық іс қозғады. Кәсіпорынның директоры мен инженері қамауға алынған болатын. Қазір стратегиялық нысанға Олег Перфилов жетекшілік етеді. Ол кәсіпорын жаңа жылыту маусымына дайын екеніне сендірмек болды, дегенмен қалған екі мұржаның тағы біреуі кезек күттірмей жөндеуді талап ететінін мойындады.

«Қазіргі таңда Жылу электр орталығында бес қазандық қалыпты жағдайда жұмыс істеп тұр. Оның біреуі резевте. Қазан айының басында тағы төртеуін іске қосуды жоспарлап отырмыз.  Сондай-ақ бүгінгі күнге дейін біз екінші түтін мұржасын жөндеп үлгердік. Оны да екі жылдан соң ауыстыру керек. Себебі ол да ескірген. Жалпы алдағы жылыту маусымына үлгеру үшін орталықта 10 мердігер компания жұмысқа шақырылды. Шамамен 400-дей адам. Сондықтан алаңдамауға болады. Біз алдағы жауапты науқанға сақадай саймыз деп айта аламын.  Қазірдің өзінде станцияның жүктемесі – 200 МВТ», - дейді «СевКазЭнерго» АҚ бас директоры Олег Перфилов.

Дегенмен, ұжым үшін биылғы жаз оңай болған жоқ. Жұмысшылар ескіні жөндеп, жыртықты жамаумен болды. Ал қала тұрғындары қыс маусымының қалай өтетініне алаңдайды. Оны әлеуметтік желілерде жиі жарияланып  тұратын жазбалардан да аңғаруға болады. Облыс орталығында 4,5 мыңнан астам нысан орталық жылыту жүйесіне қосылған.

«Жылу орталығының басшылығы бізді көп уақыт бойы алдап келді. Коммуналдық қызмет тарифі жыл сайын көтеріледі. Компания жетекшілері қаржының кәсіпорынды жаңалауға кетіп жатқанын айтты. Бірақ қыс бойы бірнеше рет апат болып, сөздің іспен қабыспайтынын дәлелдеді. Дегенмен қазір стратегиялық нысан басшылығы халықты өз жоспарынан жиі хабардар етіп, нақты жұмыс кестесімен бөлісіп тұрады. Біртіндеп сенім ұялатып жатқандай. Бізде де сенуден басқа амал жоқ. Қаладан басқа жаққа кете алмаймыз. Қазір дүрбелең туғызатын сәт емес. Бәрінің жақсы болғанын қалаймыз әрине. Енді қаланың жылыту маусымының қосылуын күтеміз.  Өзімнің қысқа арналған екі жоспарым бар. Өткен жылы суық болды. Биыл да жағдай қайталануы мүмкін екенін ескеріп, жылытқыш құралдар мен қалың киімдер сатып алдым. Егер жағдай тіпті қиындаса, ауылға, анамның үйіне кетемін. Өйткені онда автономды жұмыс істейтін пеш бар. Бір сөзбен айтқанда бәрі жақсы болады деп үміттенсек те, кез келген жағдайға дайын болуға күш салып жатырмыз», - дейді Петропавл қаласының тұрғыны Елена Кузнецова.

Қызылжар  – Қазақстанның ең суық өңірлерінің бірі. Жылыту маусымы жарты жылдан артық уақыт бойы жалғасады. Өңір халқы жылына 400 мың тоннадан астам қатты отын тұтынады. Көмір тапшылығы мәселесі бірнеше жылдан бері жалғасып келеді. Қазір жеке тұрғын үй секторында тұратын халық қоймаларға көмірдің түсуін аңдумен жүреді. Жылыту маусымы басталғанымен, тұтынушылардың 20 пайыздан астамы қатты отын сатып алып үлгермеген.