Бұл жобалар 2022-2027 жылдары іске асырылмақ
АҚШ инвесторлары Қазақстанда 320 млрд теңгеге жобаларды жүзеге асыруға көмектеседі, деп хабарлайды Azattyq Ruhy LS-ке сілтеме жасап.
Инвестициялық пулға сәйкес, Қазақстанда АҚШ инвесторларымен бірлесіп сегіз жобаны іске асыру жоспарлануда. Жобалардың жалпы құны 321,5 млрд теңге. Нәтижесінде 3,3 мыңға жуық қазақстандық жұмысқа орналаса алады деп күтіліп отыр.
Бұл жобалар 2022-2027 жылдары Қарағанды, Ақмола, Солтүстік Қазақстан, Ақтөбе, Шығыс Қазақстан облыстары мен Алматыда іске асырылмақ.
Қазіргі уақытта үш нысан салынып жатыр. Мәселен, елдің шығысында қуаттылығы жылына 39 мың тонна шошқа етін өндіретін кәсіпорын салынуда. Құны – 117 млрд теңге. 1,7 мың жұмыс орны құрылады. Ал Ақмола облысында 105 млрд теңгеге бағалы металдарды (алтын) өңдеу және байыту ісі қолға алынады. Ол нысандардың ашылуы келесі жылға жоспарланған.
Сонымен қатар, Қарағанды облысында 30,5 млрд теңгеге "SX–EW әдісімен мысты шоғырлы сілтісіздендіру зауытын салу" жобасы бойынша құжаттама дайындалуда. Алматыда американдық компаниялардың қатысуымен 25 млрд теңгеге тамшылатып суару жүйесін және 17,5 млрд теңгеге вакциналар өндірісін ашу жоспарланған.
Бұған дейін, АҚШ инвесторы Павлодар картопына қызығушылық танытып, оны өңдеуді жоспарлғаны хабарланған болатын. Сонымен қатар, шетелдік компания Павлодар өнімдерінің шет елдерге саудасы мен маркетингін жолға қоюға дайын екендігі атап өтілді.
Естеріңізге сала кетейік, президент Қасым-Жомарт Тоқаев жұмыс сапарымен Нью-Йоркте жүр.