Өлім себебі сот-медициналық сараптама негізінде анықталады
Орал қаласында ардагерлер арасындағы футбол ойыны кезінде 59 жастағы ер адам көз жұмды. Бұл туралы БҚО дене шынықтыру және спорт басқармасының бөлім басшысы Дәурен Мұқанов мәлім етті, деп хабарлайды Azattyq Rýhy ҚазАқпаратқа сілтеме жасап.
Оқиға 17 қыркүйек күні түске дейін «Ақжайық» футбол клубының стадионында болған.
«Оралда 50 жастан асқан ардагерлер арасында республикалық спартакиада аясында шағын футбол жарысы «Ақжайық» стадионында өтіп жатқан. Қайғылы оқиға Қызылорда мен Түркістан облыстары командалары арасындағы матч кезінде болды. Бәсеке басталғаннан бес минуттан өткеннен кейін алаң шетінде допты қосу кезінде қызылордалық ойыншы құлап қалған. Сол жерде дәрігерлер медициналық көмек көрсетті. Жедел жәрдем де жетті. Алайда, 59 жастағы ер адамды аман алып қалу мүмкін болмады. Оның денсаулығына шағымы болмаған және дәрігерден жарысқа қатысуға рұқсат алған», - деді Д. Мұқанов.
БҚО денсаулық сақтау басқармасының баспасөз хатшысы Айнагүл Сақпосынованың нақтылауынша, жедел жәрдем сағат 11:54-те шақырылған. 1963 жылғы ер адам жедел жәрдем жеткенге дейін қайтыс болды. Өлім себебі сот-медициналық сараптама негізінде анықталады.