Ауылдарда денсаулық сақтау нысаны негізінде дәріхана пункттері ашылады

Амбулаториялық дәрі-дәрмекпен қамтамасыз етуге енгізілмеген дәрілердің қол жетімділігін арттыру үшін осы жылы Халық денсаулығы туралы кодекске ауылдық денсаулық сақтау нысандары базасында дәріхана пункттерін құру туралы өзгерістер енгізілді, деп хабарлайды Azattyq Ruhy.

Орталық коммуникациялар қызметі алаңында өткен брифинге ҚР Денсаулық сақтау министрі Ажар Ғиният аталған норма биылғы 5 қыркүйектен бастап күшіне енетінін айтты.

«Дәрі-дәрмекпен 4542 ауыл (немесе 80 %) қамтамасыз етілген, ал 1145 елдімекеннің дәрі-дәрмекпен қамтамасыз ету проблемасы шешілуде. Соңғы 2 ай аралығында ауылдық елдімекендердегі алғашқы медициналық-санитарлық көмек жанындағы 8 дәріхана пунктінің 59 дәріханасына лицензиялар және оған қосымшалар берілді. Сонымен қатар сақтандырылмаған азаматтарды сақтандыру жүйесіне қосу және медициналық көмектің қол жетімділігін арттыру мақсатында заңға 12 айға алдын ала төлем жасау нормасы енгізілді. Осылайша, Міндетті әлеуметтік медициналық сақтандыру жүйесіндегі медициналық көмек жарналарды төленген сәттен бастап қолжетімді болады», - деді А.Ғиният.

Оның айтуынша, ауыл халқы үшін скринингтердің жеткіліксіздігін ескере отырып, 18 жастан бастап жаңа нысаналы топтарды анықтау арқылы ауыл халқын қамтуды ұлғайту тәсілдері қайта қаралған. Ауылдық жерлерде профилактикалық тексеру жүргізу үшін «Балалар», «Жастар», «Зейнеткер», еңбек жасындағы азаматтар сынды нысаналы топтар айқындалды.

«Қыркүйек айының ортасынан бастап Қарағанды (Абай ауданының орталық аудандық аурухана), Ақмола (Аршалы орталық аудандық аурухана) және Алматы (Еңбекшіқазақ орталық аудандық аурухана) облыстарында ауыл халқы скринингінің пилоттық жобасы іске қосылып, кейіннен барлық өңірлерде кезең-кезеңмен енгізіледі», - деді А. Ғиният.

Сонымен қатар соңғы 3 жылда ауылдық денсаулық сақтаудың қол жетімділігін жақсарту бойынша қаражат деңгейі 95%, яғни 143,3 млрд теңгеге дейін өсті.