Жыл басынан бері мүгедектігі бар жандарға 176 млрд теңге жәрдемақы төленді

Azattyq Rýhy

Мүгедектік бойынша 528,9 мың адам, асыраушысынан айырылу жағдайы бойынша 180,1 мың адам әлеуметтік жәрдемақы алады

 

 
Жыл басынан бері мүгедектігі бар жандарға 176 млрд теңге жәрдемақы төленді
Фото: shutterstock.com

Қазақстандықтарға мүгедектік және асыраушысынан айырылу бойынша 175,8 млрд теңгеден астам сомаға жәрдемақы төленді, деп хабарлайды Azattyq Ruhy.

Еңбек және халықты әлеуметтік қорғау министрлігінің мәліметіне сүйенсек, 1 маусымдағы жағдай бойынша қазақстандықтарға мүгедектік және асыраушысынан айырылу бойынша 175,8 млрд теңгеден астам қаражат төленді. Оның ішінде 2022 жылдың мамыр айында республикалық бюджеттен мүгедектік бойынша мемлекеттік әлеуметтік жәрдемақы төлеуге 27,7 млрд теңге, асыраушысынан айырылуына байланысты жәрдемақы төлеуге 8,2 млрд теңге жұмсалды.

«2022 жылғы 1 маусымдағы жағдай бойынша мүгедектік бойынша мемлекеттік әлеуметтік жәрдемақы алушылардың саны 528,9 мың, асыраушысынан айырылу жағдайы бойынша 180,1 мыңға жетті», - делінген хабарламада.

Мүгедектік және асыраушысынан айырылу жағдайы бойынша мемлекеттік әлеуметтік жәрдемақылардың мөлшері мүгедектік тобына және себебіне, қайтыс болған (қаза тапқан) асыраушының асырауындағы адам санына, сондай-ақ тиісті қаржы жылына арналған «Республикалық бюджет туралы» заңда белгіленетін ең төменгі күнкөріс деңгейіне байланысты болады.

2022 жылғы 1 маусымдағы жағдай бойынша мүгедектік жөніндегі мемлекеттік әлеуметтік жәрдемақының орташа мөлшері – 52 318 теңге, асыраушыдан айырылу жағдайы бойынша төленетін жәрдемақы – 45 906 теңге.

×
Бұл желілік ресурстың ақпараттық өнімдері 18 жастан асқан адамдарға арналған.