СҚО-да балықтардың қырылу себебі анықталды
Балықтар су айдынындағы таяз жерлердің түбіне дейін қатуынан қырылған
Солтүстік Қазақстан облысында Жекекөл, Логовое, Пестрое көлдерінде балықтың қырылу себебі анықталды. Бұл туралы облыстық экология департаменті мәлім етті, деп хабарлайды Azattyq Rýhy.
Департамент мәліметінше, ведомствоаралық жұмыс тобының отырысында Айыртау ауданының Логовое, Қызылжар ауданының Пестрое және Жамбыл ауданының Жекекөл көлдерінде балықтың қырылу себептері айтылған.
Мамандар пайымынша, қырылу су айдынындағы таяз жерлердің түбіне дейін қатуы себебінен болған. Осыған орай Есіл облысаралық бассейндік балық шаруашылығы инспекциясына су айдындарындағы ихтиофаунаның жай-күйін білу үшін биологиялық материал жинау мақсатында балық аулау ұсынылды.
Мелиоративтік аулау жөніндегі комиссия Айыртау ауданының Луговое көлінде балық аулау мәселесін қарауы керек.
Ал Қызылжар ауданының Пестрое көлі мен Жамбыл ауданының Жекекөл көлдерін жалға алушылар балық пен олардың шабақтарын құтқару үшін тиісті шаралар атқаруы тиіс. Жергілікті атқарушы органға осы су айдындарының жай-күйіне тұрақты мониторинг жүргізу ұсынылды.
