Бір жылда үй жануарларының кесірінен болған жол апаттарынан 30 адам қаза тапқан

Azattyq Rýhy

Былтыр және биылғы үш айда үй жануарларының кесірінен 120 жол-көлік оқиғасы тіркелді

Фото ашық дереккөзден

Қазақстан жолдарында былтыр және биылғы үш айда үй жануарларының кесірінен 120 жол-көлік оқиғасы болып, 33 адам қаза тапты. Бұл туралы «Қазақавтожол» компаниясының баспасөз қызметі мәлім етті, деп хабарлайды Azattyq Rýhy.

«Қазақавтожол» компаниясы мәлім еткендей, 2021 жылы жолда жүрген малды көлік қағып кетудің 109 дерегі тіркелген. Одан 139 адам зардап шегіп, 30 адам қаза тапты.

«2022 жылдың бірінші тоқсанында осындай 11 жол-көлік оқиғасы тіркелді, онда 15 адам түрлі дене жарақаттарын алса, 3 адам қайтыс болды», - деді «Қазақавтожол» Алматы облыстық филиалының бас инженері Берік Сарқытбаев.

Оның айтуынша, республикалық маңызы бар жолдардың бойында малдың жолға шығуына кедергі келтіретін 855,331 шақырым қорғаныс қоршау орнатылды.

«Осы бағытта республикалық маңызы бар жолдардағы қауіпсіздікті қамтамасыз ету мақсатында республикалық акция іске қосылды, оның шеңберінде серіктестік үй жануарларын бақылаусыз жаю қаупі туралы жадынама әзірлеп, үй жануарларының иелерімен жеке кездесулер мен түсіндіру жұмыстарын жүргізуде. Сондай-ақ, акция аясында үй жануарларына арналған жарық шағылыстыратын ленталар таратылып беріліп жатыр»,- дейді спикер.


 

 

×
Бұл желілік ресурстың ақпараттық өнімдері 18 жастан асқан адамдарға арналған.