«Алматы жастары» бағдарламасына құжат қабылдау мамырда басталады

Azattyq Rýhy

Бағдарлама аясында биыл 1 мың жас отбасы баспанамен қамтамасыз етіледі

«Алматы жастары» бағдарламасына құжат қабылдау мамырда басталады
Фото: almaty.tv

Биыл «Алматы жастары» жобасы аясында қаланың 1 мың тұрғыны баспаналы болады, деп хабарлайды Azattyq Rýhy тілшісі ҚазАқпаратқа сілтеме жасап.

Алматы әкімдігі баспасөз қызметінің мәліметінше, құжаттар мен өтініштерді қабылдау мамыр айына жоспарланған. Несиенің ең жоғары сомасы 18 млн теңгеге дейін.

«Жеңілдікпен несиелендіру бойынша «Алматы жастары» қалалық бағдарламасы шеңберінде өтінімдер мен құжаттарды қабылдау нақты қашан басталатыны, бағдарламаның биылғы жылғы шарттары мен талаптары бойынша ақпарат қалалық Тұрғын үй саясаты басқармасының сайтында және әлеуметтік желідегі парақшаларында жарияланатын болады», - делңнген хабарламада.

Осы бағдарлама аясында биыл 1 мың жас отбасы баспанамен қамтамасыз етіледі.

Айта кетейік, бағдарламаға 35 жасқа дейінгі жастар қатыса алады, олар: медицина қызметкерлері, мұғалімдер, ЖОО мен ҒЗИ оқытушылары, ғылыми қызметкерлері, мәдениет және спорт саласының қызметкерлері, журналистер, жазушылар, халықты әлеуметтік қорғау және құқық қорғау органдарының мамандары.

2020 жылы үй алуға берілетін қарыз 13 млн теңге еді. Былтыр несие көлемі 18 млн теңгеге арттырылды. Егер өтінім қабылданса, оның 10 пайызын, яғни 1,8 миллион теңгені бастапқы жарна ретінде төлеп, 18 млн теңгеге баспана алуға болады.

×
Бұл желілік ресурстың ақпараттық өнімдері 18 жастан асқан адамдарға арналған.